МЭНДЧИЛГЭЭ

ГҮЙЦЭТГЭХ ЗАХИРЛЫН  МЭНДЧИЛГЭЭ  

 

Хүндэт хувьцаа эзэмшигчид, нийт харилцагчид, бизнесийн түншүүдээ, Та бүхэнд чин сэтгэлийн халуун мэндчилгээ дэвшүүлье.

 

Манай улсын эдийн засгийн өсөлт 2013 онд 11.7 хувь болж өнгөрсөн оноос буурсан боловч өсөлтийн хувиараа дэлхийн хурдацтай өсөж буй орнуудын тоонд зүй ёсоор багтав. Бидний хувьд 2013 онд компанийн засаглалаа сайжруулах шат дараалсан арга хэмжээг авч хэрэгжүүлсэн, бизнесийн цар хүрээ, үйл ажиллагаагаа өргөжүүлэн нийт активаа 654 тэрбум төгрөгт, нийт пассиваа 613 тэрбум төгрөгт, дүрмийн сангаа 11 тэрбум төгрөгөөр нэмэгдүүлж 33 тэрбум төгрөгт хүргэн харилцагчдын өмнө хүлээх хариуцлагаа бэхжүүлсэн амжилт бүтээл дүүрэн жил болж өнгөрөв.

 

Банкны үндсэн үзүүлэлт болох актив, пассивын хэмжээ сүүлийн 5 жилд тасралтгүй өссөн бөгөөд өнгөрсөн онд арилжааны банкуудаас хамгийн өндөр өсөлттэй банк байв.

 

Монгол банк болон Засгийн газраас хэрэгжүүлсэн дотоодын үйлдвэрлэлийг хөгжүүлэх, үнэ тогтворжуулах, үндэсний компаниудын бүтээн байгуулалтыг дэмжих бодлого, төсөл хөтөлбөрийг идэвхитэй дэмжиж ажиллалаа. Үндэсний хэмжээний банк болох зорилтынхоо хүрээнд Улаанбаатар хот болон орон нутагт салбар, нэгжүүдээ шинээр нээж, нийт 50 гаруй АТМ, 100 гаруй ПОС машиныг суурилуулан банк санхүүгийн үйлчилгээг харилцагч үйлчлүүлэгчиддээ улам бүр ойртууллаа. Түүнчлэн гурвалсан валюттай Unionpay картыг зах зээлд нэвтрүүлсэн 2 дахь Монгол Улсын арилжааны банк болж, ухаалаг утсанд зориулан Smart bank буюу “Миний банк’ аппликэйшныг амжиллтай нэвтрүүллээ.

 

Бид компанийн зохистой засаглалыг зохих ёсоор хэрэгжүүлж чадвал хувьцаа эзэмшигчид, харилцагчдын итгэлийг нэмэгдүүлж, үр ашигтай хяналтын тогтолцоо, удирдлага, эрх мэдэл, ашиг орлогын зүй зохистой, зөв хувиарлалтыг бий болгон эдийн засгийн өсөлтийг хангана гэж үздэг. Тиймээс өнгөрсөн онд компанийн засаглалаа сайжруулах чиглэлээр Дэлхийн банкны гишүүн байгууллага болох Олон Улсын Санхүүгийн Корпораци /IFC/-тай хамтран ажиллах гэрээг үзэглэн банкны засаглалаа олон улсын түвшинд хүргэх шат дараалсан ажлыг хийж байна.

 

Банкны нийгмийн хариуцлагын бодлого, үйл ажиллагааны хэтийн зорилтын хүрээнд Монгол Улсын Засгийн Газар болон төрийн бус байгууллага, олон улсын байгууллагуудаас санаачилсан 10 гаруй хөнгөлөлттэй төсөл хөтөлбөрийг хэрэгжүүлж Жижиг Дунд Үйлдвэрлэлийг дэмжин хамтран ажиллав. Мөн жижиг, дунд үйлдвэрлэлийн зээл авахад барьцаа, баталгаа дутмаг аж ахуйн нэгж, иргэдэд дэмжлэг үзүүлэх зорилгоор Зээлийн батлан даалтын сантай хамтран ажиллаж, Монгол улсад анх удаа  250.0 сая төгрөгийн батлан даалтыг гаргалаа.

 

Нийгмийн хариуцлагыг хэрэгжүүлэгч байгууллагын хувьд жил бүр уламжлал болгон зохион байгуулдаг  “Халуун сэтгэл” цус хандивлах аян, “Дэлхийн хадгаламжийн өдөр”, “Унагалдай” хадгаламжийн нэрэмжит өдөрлөг  болон бусад нийгмийн сайн сайхны төлөөх олон арга хэмжээ, ивээн тэтгэлэг, хамтын ажиллагаа нь олон нийтэд үнэлэгдэж нийгэмд хувь нэмрээ оруулсаар байна. Монгол улсын ирээдүй болсон хүүхэд залуучуудын эрүүл мэнд, төлөвшилд эерэг нөлөөтэй урлаг, спортын үйл ажиллагааг дэмжин ажилладаг бөгөөд энэ ажлын хүрээнд Монголын үндэсний сагсан бөмбөгийн ‘Спрайт’ супер лигт өөрийн “Капитал шонхорууд” багийг ивээн тэтгэн амжиллтай оролцуулж байна.

Банкны ажиллагсдынхаа нийгэм ахуйн асуудлыг шийдвэрлэх, ажиллах урам зоригийг нэмэгдүүлэх зорилгоор буцалтгүй тусламж, тэтгэмж хөнгөлөлттэй нөхцөлтэй зээлийг олгохоос гадна мэдлэг боловсролыг дээшлүүлэх чиглэлээр банкны дотоод сургалт, гадны болон олон улсын мэргэжлийн байгууллагаас зохион байгуулж буй сургалт, хурал зөвлөгөөнд тогтмол хамрууллаа.

Оны эцэст банкныхаа байнгын, идэвхитэй 300 орчим харилцагч, хамтран ажиллагч байгууллагуудыг нэгэн дор цуглуулж, жилийн турш хийсэн ажлын алдаа оноог дүгнэж, цаашдын хамтын ажиллагааны талаар ярилцах, тэдэнд талархлаа илэрхийлэн, онцлох харилцагчдаа тодруулах ёслолын арга хэмжээг уламжлал ёсоор зохион байгуулав.Банкны томоохон түнш харилцагчидтай өөрийн биеэр уулзаж, бизнесийн үйл ажиллагааны талаар танилцах нөхөрсөг ярилцлагыг хийдэг.

Мөн Улаанбаатар хот төдийгүй орон нутаг дахь алслагдсан салбар,нэгж дээр удирдлагын багуудын хамт тодорхой давтамжтай очих, газар дээр нь үйл ажиллагаатай нь танилцан тэдний хэрэгцээ шаардлагыг сонсох, зөвлөмж өгөх зэрэгт Гүйцэтгэх удирдлагын хувьд  анхаарал тавьж ажиллаж байна.

 

Манай улсын эдийн засгийн эд эс нь болсон аж ахуйн нэгжүүд дор бүрнээ компанийн засаглалын зарчмуудыг үйл ажиллагаандаа хэвшил болгож, нийгмийн хариуцлагыг ухамсарлан, өндөр түвшинд хэрэгжүүлэн ажиллаж, Монгол Улсын эдийн засгийн өсөлт хөгжилтөнд бодитой хэмжээгээр нөлөө үзүүлээсэй хэмээн хүсч, арилжааны анхны банкны хувьд үлгэр дууриал болохыг зорин ажиллаж байна.

 

Сэтгэл зүтгэлээ зориулан ажилладаг банкны нийт ажилтнууд, бидэнд итгэл хүлээлгэн хамтран ажилладаг Төлөөлөн Удирдах Зөвлөл, Хувьцаа эзэмшигчид, Харилцагчид, Түншүүд Та бүхэндээ талархал илэрхийлье. Мөн цаашид бид дотоодын үйлдвэрлэл, жижиг дунд бизнесийг дэмжсэн ногоон банк байх зорилтдоо үнэнч байж, харилцагчийн эрх ашгийг єндєрт єргєн нээлттэй, ил тод байдлаа бэхжүүлэн ажиллахаа Та бүхэндээ илэрхийлье.

 

 

Хүндэтгэсэн

 

 

 

А.Ариунболд

Гүйцэтгэх захирал